Hringferð – frá vesturströnd til norðurs og niður í Orotava-dalinn 🌴🍷

​

Við keyrum norður eftir vesturströndinni í átt að Teno-fjallgarðinum og förum í gegnum hið fallega fjallaþorp Santiago del Teide, áður en við höldum yfir til norðurstrandarinnar. Þar stoppum við á kaffihúsi og útsýnisstað með glæsilegu útsýni niður til Garachico, sem var einn helsti bær eyjarinnar á 16. og 17. öld.

​

Því næst liggur leiðin niður hlíðarnar til bæjarins Icod de los Vinos, þar sem við skoðum meðal annars hið forna drekatré, talið vera um 1.000 ára gamalt – elsta sinnar tegundar í heiminum. Bærinn er einnig þekktur fyrir vínframleiðslu, og við stoppum á skemmtilegum stað í húsi frá 17. öld, sem nú hýsir lítið „safn“ með fallegum garði. Þar fáum við að smakka nokkur af bestu vínum eyjarinnar, ásamt ljúffengum ostum og sósum.

​

Við höldum svo áfram eftir norðurströndinni í átt að Orotava-dalnum – oft kallaður „gullni dalurinn“. Þar stoppum við í bænum La Orotava, heimabæ fararstjórans okkar, Jónu Dísar. Við röltum um þennan sögulega bæ sem tók að byggjast upp snemma á 16. öld og varð miðstöð dúkasaums og hefðarbúninga á fyrri öldum. Dalurinn er einstaklega gróðursæll og þykir einn fallegasti staður Tenerife.

Að lokinni skoðunarferð snæðum við hádegisverð á hinum vinsæla veitingastað Bodega Álvaro, þar sem við njótum hefðbundins kanarísks matar og húsvíns framleidds á staðnum. Staðurinn er einstakur – með yfir 40 þúsund rauðvínsflöskur sem „skreyta“ veggina, sú elsta frá árinu 1845.

​

Eftir hádegisverð ekið við áfram niður í Puerto de la Cruz, neðst í Orotava-dalnum. Bærinn var helsti ferðamannastaður Tenerife áður en suðurhlutinn opnaðist á áttunda áratugnum – og í raun fyrsti ferðamannastaður Kanaríeyja. Þar opnaði elsta starfandi hótel eyjunnar árið 1888, og m.a. dvaldi Agatha Christie þar um tíma og skrifaði nokkrar af bókum sínum.

​

Puerto de la Cruz er sjarmerandi bær með fallegum gömlum byggingum og líflegri stemningu. Við göngum frá öðrum enda bæjarins yfir á aðaltorgið (um 30 mínútna ganga) og njótum útsýnis, bananaplantekra og fallegs sundlaugarðs á leiðinni.

Að lokum höldum við aftur suður á ferðamannasvæðið, lokum hringnum og keyrum m.a. fram hjá norðurflugvellinum Los Rodeos, sem á sér áhugaverða sögu, og hinni gömlu höfuðborg La Laguna.
Ferðin tekur um 9 klukkustundir, en gæti orðið allt að 10 klukkustundir með stoppum og hádegismat.

​

ATH: Við sækjum og skilum á Hótel í Los Cristianos, Las Americas og Adeje (þó ekki vestur af La Caleta).