Hálfsdagsferð upp á hæsta fjall Spánar – El Teide 🌋

​

Við leggjum í hálfsdagsferð upp í El Teide, hæsta fjall Spánar, þar sem við förum í gegnum sex mismunandi gróðurbelti sem prýða eyjuna.

​

Fyrsta stopp er í þorpinu Arona, þar sem við heimsækjum Aloe Vera-búgarð og fáum stutta kynningu á þessari mögnuðu plöntu — sem er í raun ekki kaktus, heldur „grænmeti“. Þar kynnumst við einnig vörum sem unnar eru úr plöntunni og notaðar eru bæði til fegrunar og lækninga.

​

Þá heldur förin áfram upp í fjöllin, fram hjá bænum Vilaflor, einu hæsta byggða bóli Spánar (í um 1.600 metra hæð). Við stoppum þar við eitt elsta tré eyjarinnar, hið stórbrotna Pino Gordo – um 800 ára gamalt kanarískt furutré og eitt hæsta tré Spánar, nær 50 metra hátt. Þar fá allir að „faðma tréð“ – því bolurinn er um 10 metrar í ummáli!

​

Við höldum áfram upp í Teide-þjóðgarðinn, þar sem við stöðvum við „Drottningarskóginn“ og García-klettana – stórbrotna náttúruperlu þar sem Clint Eastwood tók upp hluta nokkurra spaghetti-vestra. Þarna, í um 2.200 metra hæð, gefst einnig tækifæri til að skoða ferðamannamiðstöð þjóðgarðsins, sem er vel þess virði að heimsækja.

​

Að lokum förum við innar í þjóðgarðinn, snæðum hádegismat og njótum útsýnisins áður en við höldum til baka í gegnum þorpið Chío og niður á ferðamannasvæðið.